Орталық Азия сауданы жеделдетуде: Душанбеде рәсімдерді цифрландыру және оңайлату мәселелері талқыланды
Сауда рәсімдерін цифрландыру, қағазсыз саудаға көшу және өңірлік сауданың бәсекеге қабілеттілігін арттыру мәселелеріне баса назар аударылды.
Цифрландыру, қағазсыз құжат айналымы және өңірлік экономикалық интеграцияны нығайту – Орталық Азия елдерінің Сауда рәсімдерін оңайлату жөніндегі Ұлттық комитеттерінің (СРОҰК) 14-Өңірлік отырысында талқыланған басты тақырыптар.
Осы жылдың 27–28 қазанында Душанбеде өткен бұл іс-шара өңір елдерінің негізгі қатысушыларын тәжірибе алмасу және трансшекаралық сауда саласындағы ортақ басымдықтарды айқындау мақсатында біріктірді.
Отырысты Германияның Федералдық экономикалық ынтымақтастық және даму министрлігінің (BMZ) тапсырысы бойынша Deutsche Gesellschaft für Internationale Zusammenarbeit (GIZ) GmbH жүзеге асырып жатқан «Орталық Азияда сауда рәсімдерін оңайлату» өңірлік жобасы аясында ұйымдастырды.
Жиынға Орталық Азияның бес елінен көлік және экономика министрліктерінің, кеден және азық-түлік қауіпсіздігі органдарының, жеке сектор мен халықаралық ұйымдардың өкілдері қатысты.
.jpg)
Қазақстан тарапынан кездесуге ҚР Сауда және интеграция министрлігі, Көлік министрлігі, Қаржы министрлігінің Мемлекеттік кірістер комитеті, «Атамекен» Ұлттық кәсіпкерлер палатасы және «Kazlogistics» көлік қауымдастығы қатысты.
Кездесудің басты мақсаты – өңірлік ынтымақтастықты дамыту және Орталық Азияда сауданы жүргізудің неғұрлым ашық әрі тиімді жағдайларын жасау бойынша практикалық қадамдар әзірлеу.
Пленарлық сессиялар барысында қатысушылар өз елдеріндегі сауда рәсімдерін оңайлату шараларын таныстырып, бизнесті реформа процесіне тартудың табысты мысалдарын талқылады.
Жиында сауда рәсімдерін цифрландыруға, қағазсыз саудаға көшуге және өңірлік сауданың бәсекеге қабілеттілігін арттыруға ерекше назар аударылды.
Тәжікстан Республикасының Экономикалық даму және сауда министрінің бірінші орынбасары Солехзода Ашурбой өз сөзінде үйлестірудің маңыздылығын атап өтті:
«СРОҰК өңірлік кездесулері шеңберіндегі елдер арасындағы өзара іс-қимыл жыл сайын серпінді дамып, сапалы жаңа деңгейге шықты. Біз сауданы оңайлату рәсімдерін жетілдіру арқылы тығыз сауда-экономикалық ынтымақтастықты қолдаймыз».
Практикалық қадамдар және стандарттау
GIZ-дің Тәжікстандағы директоры Сабине Ольтхоф цифрлық шешімдерді дамыту және өңір елдерінің ынтымақтастығы тұрақты экономикалық өсудің негізгі шарттары екенін атап өтті.
Жалпы пікірталастармен қатар, мамандандырылған жұмыс топтарында келесі бағыттар бойынша практикалық қадамдар айқындалды:
көлік-транзит жүйелерін үйлестіру;
электрондық фитосанитарлық сертификаттарды (ePhyto) енгізу;
сауда процестерін халықаралық стандарттарға сәйкестендіру.
GIZ-дің өңірлік жобасы Орталық Азия елдеріне трансшекаралық сауданың ашықтығы мен тиімділігін арттыруға, сондай-ақ өңірлік экономикалық интеграцияны нығайтуға жәрдемдесуді жалғастырып келеді.
Пікір қалдыру:
Пікірлер: