ШҚО-да бағдарлама мәдениет саласында тұралап тұр, ал спортта жұмыс істеп жатыр: жеткізушілер «Даму Бала» бойынша тексеріс жүргізуді талап етті
Шығыс Қазақстан облысында мемлекеттік шығармашылық тапсырысты жан басына қаржыландыру бағдарламасының жеткізушілері арасында наразылық күшейіп келеді. Олар «Даму Бала» платформасының жұмысына байланысты жүйелі заңбұзушылықтар мен ШҚО Мәдениет басқармасының әрекетсіздігіне назар аударуда. Ал Спорт басқармасы тарапынан мұндай мәселелер тіркелмеген.
Наразы кәсіпкерлер ШҚО Экономикалық тергеп-тексеру департаментіне және прокуратураға жүгінді.
Бұл мәселені талқылау, бағдарламаның қатысушыларының әрекеттеріне құқықтық баға беру және ықтимал сыбайлас жемқорлық тәуекелдерін анықтау мақсатында олар ШҚО Кәсіпкерлер палатасының алаңында бас қосты.
Жеткізушілердің айтуынша, бағдарлама іске қосылған 2021 жылдан бері өңірде 7 мың балаға арналған 30 ұйым мақұлданған. Алайда іс жүзінде тек 3 200-ге жуық бала ғана қатысып жүр. Бағдарлама басталғалы бері қаржыландыру көлемі өзгермей, жыл сайын 870 миллион теңге бөлінеді. Бұл барлық баланы қамтуға жеткіліксіз: ваучері мақұлданған шамамен 3 800 бала әлі күнге дейін сабақтарын бастай алмай отыр.
«Балалар күтуде, ата-аналар қоңырау шалуда, бірақ кезек қозғалмай тұр. Ваучерлер босайды, бірақ жаңа орындар ашылмайды. Бұл — ереженің тікелей бұзылуы, кезек күн сайын жаңартылып отыруы тиіс», — дейді үйірме жетекшілері.
Айта кетерлігі, Спорт басқармасында процесс үздіксіз жүріп жатыр — кезек ашық, ваучерлер қаржы түскен сайын бөлінуде, ал Мәдениет басқармасында кезек «тоқтап қалған».
Бюджет тапшылығына қарамастан, 2025 жылы дәл осы Мәдениет басқармасы сегіз жаңа жеткізушіні мақұлдаған. Кәсіпкерлердің пікірінше, мұндай шешім жағдайды одан әрі күрделендіреді, себебі бар қатысушыларды қаржыландырудың өзі жеткіліксіз.
Бизнес өкілдерінің негізгі шағымы «Даму Бала» IT-платформасының жұмысына қатысты. Бұрынғы «ART Sport» жүйесінен көшу кезінде көптеген ақаулар мен кідірістер орын алған. Жеткізушілерге платформаның ауысатыны туралы хабарлама тек 29 наурызда жіберілген, ал толыққанды жұмыс тек шілдеде басталған.
«Біз жүйені нөлден қайта қалпына келтірдік. Ата-аналар мен балалар туралы барлық деректерді қолмен енгіздік. Бұл цифрландыру емес, нағыз әуре-сарсаң», — дейді кәсіпкерлер.
Бағдарлама қатысушыларының айтуынша, «Даму Бала» мемлекеттік органдарға өз шарттарын қояды. Платформа ресми хат жолдамай-ақ, Мәдениет басқармасынан кезекті өздері сұратуды талап етеді. Ал басқарма орындаушыға ықпал ете алмай отыр — осылайша жеке компания мемлекеттік қызметке қолжетімділікті бақылап отырғандай әсер қалдырады.
Ал Спорт басқармасы керісінше, платформаның тұрақты жұмысын және ваучерлердің уақытылы берілуін қамтамасыз етіп отыр.
Кәсіпкерлердің айтуынша, ұқсас заңбұзушылықтар басқа өңірлерде де анықталған. Жетісу облысында небәрі 7 минут ішінде 3 500 ваучер таратылған, бұл автоматтандырылған схемасыз мүмкін емес көрсеткіш. Алматы облысында ата-аналар жүйеге кіре алмаған, бірақ ақылы делдалдар арқылы бөтен адамдар ваучер алып отырған.
«Даму Бала» жүйесіне ауысқаннан кейін осындай ұсыныстар Шығыс Қазақстанда да пайда бола бастаған. Жеткізушілер қауымдастығында мұндай фактілерді растайтын хат-хабарлар мен құжаттар бар.
Жеткізушілер ШҚО Кәсіпкерлер палатасына ұжымдық өтініш жолдап, келесі талаптарды қойды:
- анықталған заңбұзушылықтар бойынша қызметтік және прокурорлық тергеу жүргізу;
- егер «Даму Бала» платформасы ашықтық пен тиімділікті қамтамасыз ете алмаса, онымен ынтымақтастықты тоқтату.
ArtSportEdu жеткізушілер қауымдастығы да ШҚО мен Алматыда «Даму Бала» платформасын уақытша тоқтатып, барлық бұзушылықтарды жойғанға дейін тексеріс жүргізуді сұрап отыр.
ШҚО Кәсіпкерлер палатасы жеткізушілерге қолдау көрсетуге дайын екенін білдірді. Алғашқы кездесуден кейін Мәдениет басқармасына келісімшартты сот тәртібімен бұзу мүмкіндігін қарастыру ұсынылды. Мұндай тәжірибе Қазақстанның басқа өңірлерінде де қолданылған.
Пікір қалдыру:
Пікірлер: